لو شاغلك جدا انك تبقى حد تقيل في المجال وانت بدأت فعلا وبقيت جنيور بس محتاج تكمل وحاسس انك تايه انا هلخصلك في البوست دا الحاجات اللي المفروض تشتغل على نفسك فيها عشان تبقى تقيل واي شركة تتمنى تشغلك عشان تبقى كدا لازم تبدأ تتحرك في النقط اللي في البوست دا وكل ما تقرا اكتر هتلاقي نفسك جامد اكتر:
- Database Design.
طريقة تصميم قاعدة البيانات هتختار قاعدة البيانات بناءا على ايه لو قاعدة بيانات قايمة على العلاقات ايه العلاقات بين الجداول اللي محتاج تعملها مثلا المقالات يرتبط بـ تعليقات الاعضاء ازاي وازاي تكون سهلة التطوير وسهلة الصيانة ويكون سرعة البيانات فيها ازاي وهتعتمد على كم البيانات ولا سرعتها ومفاهيم كتير جدا هتعرفها لما تقرا كتير عن database.
- Application architect.
طريقة اختيار وتنفيذ الابلكيشن اللي هتشتغل عليه هل تشتغل فريم ورك ولما تشتغل فريم ورك ليه وازاي وهتعمل شغلك انت جواه ازاي والعلاقات بين الحاجات وتتعلم ازاي تعمل ديزاين كويس هنا هيدخل معاك مفاهيم مهمة جدا زي Design pattern و OOP وغيرها.
- CRUD (create - read -update -delete) // ودي انت بتقول انك بتعملها حاليا
دي طبعا اللي هو ذكر انو بيعملها في البوست يودي بيانات للداتابيز يجيب بيانات يكريت بيانات ويمسحها وهكذا
- Authentication.
أي تطبيق او ابلكيشن ليه اعضاء لازم تفكر في ازاي هيتم تسجيل الاعضاء وتسجيل دخولهم وحساسية بياناتهم هنا هتحتاج معاك تفهم علوم ومعلومات كتيرة زي hashing و ال security
- Authorization.
لما اليوزر بيسجل دخول اوقات تسمح للادمن انه يعمل كل حاجة في الموقع في حين تدي صلاحية للمشرف فقط بمراجعة تعليقات الزوار نظام الصلاحيات دا من اهم الحاجات في نظم الحماية والخصوصية ومهم انك تعرف ازاي تعمله
- API
دي معروفة نوعا ما لاغلب الناس ال Application programming interface دلوقتي لما انت تكون بتعمل ابلكيشن بايثون او php ازاي واحد بتاع اندرويد هيتعامل معاك لازم تقرا عن ازاي تعمل programming interface مشتركة تخليكم على تواصل بسهولة مع بعض. هنا هيدخل تعليم حاجات كتيرة زي protocols، restful , SOAP و RSS وغيرهم.
- SESSION management
اي ابلكيشن بيحتاج انك تخزن بيانات بشكل مؤقت مع كل مستخدم زي مثلا في المواقع التجارية ال shopping cart او سلة التسوق لما تتعلم نظام استخدام الsessions وطرق تخزين المعلومات المؤقتة دي هتتعلم حاجات كتيرة في السكة.
- File management.
كل ابلكيشن برضو بيحتاج يتعامل مع الملفات يرفع الملفات يغيرها يشفرها ينقلها او يعمل دونلود ليها للاعضاء دا هيعرفك حاجات كتيرة مثلا انواع الملفات وامن الملفات وغيرها
- String manipulation.
كتير جدا من الابلكيشنز او دايما بتحتاج تعمل شوية شغل على النصوص زي مثلا انك تدور على نص معين او تغير كلمة معينة او تكون جملة او تعمل تحقق من مدخل معين لازم تكون عارف كويس ازاي تقدر تتعامل مع النصوص اللي داخلة بسهولة وبأقصر الطرق
- Localization.
لما تتعامل في ابلكيشنز بيستخدمها ناس من اكتر من بلد راسك هتخبط في الحيط لو مش عارف يعني ايه localization ازاي هتتعامل مع اللغات وهتعمل لكل يوزر اللغة بتاعتة ازاي لما مثلا واحد في عايش في امريكا بيعمل عندك حجز لتاكسي في مصر ازاي هتعرف التاكسي في مصر معاد وصوله مع انه عامل الحجز بتاعه وهو في أمريكا عشان يستناه ؟ ازاي هتدير ناس من بلاد مختلفة وعملات مختلفة في الابلكيشن بتاعك.
- Configuration.
اي ابلكيشن برضو مهم جدا جدا يكون ليه اعدادات وازاي هتعمل ال layer بتاعة الكونفجريشن وازاي تبقى سهله الاستدعاء. مثلا الادمن بيقول انه مش عايز يفتح التعليقات على المقالات. او يعمل اعدادات ان الموقع يفتح ساعتين في اليوم.
- Front-end & templates.
بقى ضروري جدا جدا لاي مبرمج backend انه يتعلم تقنيات التصميم المختلفة من ناحية الكود في الحالة دي هيعدي على vue وانجولار وبوتستراب، على سبيل المثال كان معايا جنيور php كويس جدا وكان واقع في javascript لما خلص كل الباك اند وكان فاضله يركب الديزاين اللي جاي من الفرونت اند ديفلوبر وقع تماما انا هنا مش بقول يبقى front-end لكن بقول انو على الاقل يكون فاهم ويقدر يعمل القدر البسيط فقط من التعديلات لان النهاردة محدش بيسمح ان التاسكات تفضل رايحة جاية.
شير بقى عشان غيرك يستفيد 
مهندس : محمد عوف
التعليقات: